Hindi lang ipinanganak si Hesus higit dalawang libong taon na ang nakararaan, Siya rin ay nabubuhay magpasahanggang ngayon sa ating mga Tabernakulo sa altar.
Enero 14, 2023
MABUTING BALITA
Juan 1, 35-42
Ang Mabuting Balita ng Panginoon ayon kay San Juan
Noong panahong iyon, nakatayo si Juan at ang dalawa sa kanyang mga alagad. Nakita niya si Hesus na nagdaraan, at kanyang sinabi, “Ito ang Kordero ng Diyos!” Narinig ng dalawang alagad ang sinabi niya, at sumunod sila kay Hesus. Lumingon si Hesus at nang makitang sumusunod sila ay kanyang tinanong, “Ano ang hinahanap ninyo?” Sumagot sila, “Saan po kayo nakatira, Rabi?” Ang kahulugan ng salitang ito’y Guro. “Halikayo at tingnan ninyo,” ani Hesus. Sumama sila at nakita nila ang kanyang tinitirhan; at tumuloy sila roon nang araw na yaon. Noo’y mag-iikaapat na ng hapon.
Ang isa sa dalawang nakarinig kay Juan at sumunod kay Hesus ay si Andres na kapatid ni Simon Pedro. Una niyang hinanap ang kapatid niyang ito, at kanyang sinabi sa kanya, “Natagpuan namin ang Mesiyas!” Ang kahulugan ng salitang ito’y Kristo. At siya’y isinama ni Andres kay Hesus. Tiningnan ni Hesus si Simon at sinabi sa kanya, “Ikaw si Simon na anak ni Juan. Ang ipangangalan ko sa iyo’y Cefas.” Ang katumbas ng ngalang ito’y Pedro.
Ang Mabuting Balita ng Panginoon.
Pagninilay:
“Halikayo at tingnan ninyo,” ito ang paanyaya ni Hesus hindi lamang sa Kanyang mga alagad ngunit sa ating lahat. Kailangan nating magtungo kung nasaan si Hesus upang makilala natin Siya. Saan nga ba natin Siya makikita? Tapos na ang panahon ng Kapaskuhan at mga kasiyahan. Tapos na ang kabi-kabilang mga handaan at bigayan ng regalo, alam pa ba natin kung saan matatagpuan si Hesus? Baka nasanay na tayong makita Siya at madama tuwing panahon lamang ng saya ngunit ang totoo’y Siya ay kapiling natin araw-araw.
Hindi lang Siya ipinanganak higit dalawang libong taon na ang nakararaan, Siya rin ay nabubuhay magpasahanggang ngayon sa ating mga Tabernakulo sa altar. Bumaba si Hesus dito sa lupa at Siya’y umakyat nang matapos ang Kanyang misyon subalit ang Kanyang tunay na presensiya ay nananatili – dugo at katawan. Ito rin ang parehong Banal na Katawan at Dugo sa anyo ng puting ostiya na ating tinatanggap sa Eukaristiya.
Kung gusto nating magtungo kung nasaan ang Panginoon, makilala Siya at matuto mula sa Kanya, tayo ay magtungo roon at manalangin nang taimtim. Ang panalanging mula sa puso ay masusukat sa katahimikan at sa lalim ng ating binabahagi sa Kanya tungkol sa ating buhay. Ituring natin ang Panginoon bilang ating pinakamatalik na kaibigan sa walang hanggan na maaring sabihan ng mga saloobing Siya lamang ang tanging makakaintindi at makagagawa ng paraan. Bukod dito, matatagpuan din natin si Hesus sa pagninilay sa Kanyang Salita. Ang pagtanggap ng mga Banal na Sakramento at pagninilay sa Salita ng Diyos ay pakikisama at pakikilakbay sa Kanya.
Simula noong unang unang Pasko, hindi na natin maaring sabihing tayo’y mga ulila at iniwan. Simula noon at hanggang ngayon, tayo’y namumuhay na kasama ng Diyos at patuloy pa ring inaanyayahang makituloy sa Kanya, sa Kanyang puso hanggang ngayon sa pamamagitan ng pananalangin. Doon magmumula ang ating pang-unawa sa kung ano ang tunay na misyon sa buhay na magagawa rin natin sa gabay at grasya ng Diyos.
#OLAmarikina #BirhenNgMarikina
