Pebrero 12, 2024

May mga ibang Parokya na gumagawa nito kapag Linggo o Lunes ngunit mas madalas pa rin itong ginagawa tuwing Martes, ang huling araw sa Karaniwang Panahon bago mag-Kuwaresma o Lenten Season. 40 araw ang itinatagal ng panahon ng Kuwaresma para sa pananalangin, pagbibigay ng limos at pag-aayuno. Bilang tayo ang Simbahan na katawan ni Kristo, tungkulin nating samahan ang Panginoon hindi lamang sa panahong puro kasiyahan (Panahon ng Kapaskuhan), kundi lalo sa panahong kailangan nating magsakripisyo at manalangin para sa ikaliligtas ng ating kaluluwa at ng iba. Kaisa natin si Kristo sa Kanyang pagpapakasakit at ito’y maiaalay natin hindi lamang para sa atin, kundi para sa ating mga mahal sa buhay at sa buong mundo.

Habang sinusunog ang mga palaspas at unti-unti itong nagiging abo, tandaan natin na sa abo rin tayo babalik. Ang buhay natin sa mundo ay saglit lamang at dapat nating suriin ang sarili at tanungin, “Anu-ano ang mga bagay na nakakabalakid sa aking relasyon sa Diyos?” Ang buod ng buhay ay ang makipagkaisa sa Diyos sa ating puso, pamumuhay at kaluluwa upang maging handa tayong makapasok sa Langit kapag dumating ang araw. Tandaang ang bawat isa ay mayroong paghuhusgang daraanan.

Sa huli ay tatanungin ng Diyos kung ano ang mga mabubuting ginawa natin sa buhay lalo na sa ating mga kapatid na nangangailangan. Hindi Niya tatanungin kung ilang diploma ang mayroon tayo at kung ilan ang ating mamahaling sasakyan. Ang mga ito’y sa mata lamang ng tao mahalaga ngunit iba tumingin ang Diyos. Kalugud-lugod para sa Diyos ang pusong nagsisisi at inaamin ang kanyang mga kahinaan at kasalanan sa Kanya. Kaya naman sa ating pagsusuri ng sarili, dapat nating malaman sa pamamagitan ng Espiritu Santo, ang mga kasalanan natin na mahirap mang iwanan ay gusto ng Diyos na ating talikdan, mga ugaling nakasanayan ngunit mali o may ikabubuti pa, mga hinanakit, sama ng loob at poot na dapat ay mawala at mahilom ng Diyos. Lahat ito ay kayang linisin at ayusin ng Diyos. Ang Kuwaresma ang pinakatamang panahon upang ipabago natin sa Diyos ang ating puso at buhay. Gawin natin ang tatlong haligi ng panahon ng Kuwaresma – ang pananalangin, pag-aayuno at pagbibigay ng limos.

Gawin natin ito nang taimtim at sa abot ng ating makakaya. Dumalo tayo sa Banal na Misa, magkumpisal at humingi ng grasya ng Diyos upang maging mabunga ang panahong ito para sa atin hanggang Semana Santa. Ang abo ay tanda ng pagsisisi sa ating mga kasalanan. Sa ating pagtanggap ng abo sa darating ng Ash Wednesday, nawa ay magkaroon tayo ng tunay na hangarin na panibaguhin tayong muli ni Hesus. Simulan natin ang ating Kuwaresma ng may tamang disposisyon at pusong nagsisisi. Kakaawaan tayo ng Diyos at bibigyan ng Kanyang nag-uumapaw na grasya.