Ang paglalagay ng abo sa ating mga noo ay kadalasang sinasamahan ng mga salitang "Alalahanin mo na ikaw ay alabok, at sa alabok ka babalik".
Pebrero 12, 2024
Ngayong taon, ang Miyerkules ng Abo ay natapat sa ika-14 ng Pebrero, Araw ng mga Puso. Ang Miyerkules ng Abo ay isang Banal na araw ng pananalangin, pag-aayuno, at pagsisisi. Minarkahan ito bilang simula ng Kuwaresma, ito ay isang panahon kung saan sa loob ng apatnapung araw, tayo ay nagsasakripisyo. Humahantong ito sa Pasko ng Muling Pagkabuhay.
Ang Miyerkules ng Abo o "Ash Wednesday" ay ang paglalagay ng abo sa noo ng mga mananampalataya na hugis Krus. Ang Krus ay tanda ng ating kaligtasan at ang dakilang pagmamahal ng Diyos sa atin. Ang mga abo ay karaniwang nakukuha sa pamamagitan ng pagsusunog ng palaspas na binasbasan noong nakaraang taon. Binasbasan ito sa araw ng Linggo ng Palaspas.
Ang paglalagay ng abo sa ating mga noo ay kadalasang sinasamahan ng mga salitang "Alalahanin mo na ikaw ay alabok, at sa alabok ka babalik". Nagpapaalala ito sa atin na tayo ay makasalanan at babalik din sa alabok balang-araw (Gen. 3:19). Maraming mga Kristiyano ang nag-aayuno at itinatakwil ang kanilang mga sarili sa panahon ng Kuwaresma. Isa itong paraan ng pagbabalik-loob at paghingi ng tawad sa Diyos.
Kapag tayo'y lumalapit upang tumanggap ng abo sa ating mga noo, sinasabi natin na tayo ay nagsisisi sa ating mga kasalanan at nais nating gamitin ang panahon ng Kuwaresma upang itama ang ating mga pagkakamali. Sinasabi rin natin na nais nating talikuran ang ating mga kasalanan at kontrolin ang ating mga pagnanasa sa mundo ngayong Kuwaresma.
Ano ang dapat gawin sa araw ng Miyerkules ng Abo?
Ang Miyerkules ng Abo ay isang araw ng obligasyon para sa pag-aayuno at pangingilin (Fasting and Abstinence). Ginagawa ang pag-aayuno ng mga mananampalatayang nasa gulang na 18-59. Ang pag-aayuno ay pagkain lamang ng isang buong pagkain (one full meal) o dalawang mas maliit na pagkain (two smaller meals). Maliban kung ikaw ay may sakit, buntis at may mabigat na trabaho subalit ang lahat ay dapat hindi kakain ng karne: baboy, baka, manok at iba pang tulad nito. Ang isda at lamang dagat ay hindi kasali sa mga bawal.
Ginagawa ang pangingilin ng mga nasa gulang 14 pataas. Ang pangingilin o abstinence ay hindi lamang patungkol sa pagkain. Maraming mga Kristiyano ang umiiwas sa mga materyal na bagay at iba pang mga nakasanayang gawin para mas magbigay ng oras sa pananalangin.
Kasama rin sa gawain sa araw na ito ang pagbabahagi natin sa mga nangangailangan (almsgiving) at ang pananalangin (prayer). Ang Miyerkules ng Abo at ang Biyernes Santo ay isang pandaigdigang araw ng pag-aayuno at pangingilin. Tuwing Biyernes naman sa loob Kuwaresma, tayo ay dapat na magsakripisyo at hindi kumain ng karne. Kung hindi natin ito magagawa ay maari tayong gumawa ng kapalit na kawang-gawa. Sa Biyernes Santo lamang hindi maaring palitan ng kahit ano ang hindi pagkain ng karne.
Tandaan, gawin natin ang lahat ng ito nang lihim at mula sa puso. Sa paggawa natin ng kabutihan, pag-ingatan nating hindi ito pakitang-tao (Mateo 6:1-7).
Sa ating pagpasok sa panahon ng Kuwaresma, tayo ay inaanyayahang magbalik-loob sa Diyos. Sa pagtutok natin sa apatnapung araw ng panalangin, pag-aayuno, at pagbibigay ng limos, inihahanda natin ang ating mga sarili sa Pasko ng Pagkabuhay. Ating sundan ang yapak ng ating Panginoon upang tayo ay maging karapat-dapat na makasama Niya sa Langit.
