Si Kristo ang totoong diwa ng Pasko.
UNANG SIMBANG GABI SA OLA | “Ang Pasko ay si Kristo”
Ika-15 ng Disyembre, 2023.
MABUTING BALITA
Juan 5, 33-36
Ang Mabuting Balita ng Panginoon ayon kay San Juan
Noong panahong iyon, sinabi ni Hesus sa mga Judio, “Nagpasugo kayo kay Juan, at nagpatotoo siya tungkol sa katotohanan. Hindi sa kailangan ko ang patotoo ng tao; sinasabi ko lamang ito para maligtas kayo. Si Juan ay parang maningas na ilaw na nagliliwanag noon, at kayo’y sandaling nasiyahan sa kanyang liwanag. Ngunit may patotoo tungkol sa akin na higit sa patotoo ni Juan: ang mga gawang ipinagagawa sa akin ng Ama, at siya ko namang ginaganap – iyan ang nagpapatotoo na ako’y sinugo niya.”
Ang Mabuting Balita ng Panginoon.
Homily Highlights ni Rev. Fr. Keith Buenaventura
“Mga kapatid, alam nating siyam na gabi ito. Kumakatawan sa siyam na buwan na pagdadala ng Mahal na Birheng Maria kay Hesus sa kanyang sinapupunan. Itong ginagawa nating sakripisyo ay hindi para sa anuman. Ito’y para samahan si Maria.”
Sinimulan ni Fr. Keith ang kanyang homiliya sa pagpapasalamat sa mga nagsisimba. Matapos ay binigyang diin ang temang “pagpapakatotoo” alinsunod sa ehemplo at ginawa ni San Juan Bautista sa ebanghelyo.
Aniya ang pagpapatotoo ay hindi tulad ng isang “fireworks” kung saan bongga agad ang ating gusto subalit saglit lang ang itinatagal. Kailangan din nating maging kandila tulad ni San Juan Bautista na nagniningning sa dilim nang tahimik. Para sa pagpapahayag ng Mabuting Balita, si San Juan Bautista ay nagpatotoo hanggang dulo ng kanyang buhay. Ganito rin dapat tayo sa ating pananalig ngayon. Inanyayahan ni Fr. Keith ang lahat na tapusin ang Simbang Gabi bilang pakikiisa sa siyam na buwang pagdadalang-Tao ni Maria. Samahan natin ito ng mabubuting gawa at pag-iwas sa mga tsismis.
“Ang Pasko ay si Kristo, si Kristo ang totoong diwa ng Pasko.” Ito ang mga huling sinabi ni Fr. Keith sa kanyang homiliya sa unang araw ng Simbang Gabi sa OLA.
Walang ibang mas higit na mahalaga sa paghahanda para sa Pasko kung hindi ang pagsisimba.
#OLAmarikina #BirhenNgMarikina
