Bilang isang Pilipino, bahagi ng ating pagkakakilanlan ang pagiging responsable pagdating sa mga tungkuling nakaatas sa atin. Mahalaga ang eleksyon hindi lamang dahil ito ay isang obligasyon bagkus, dahil ito rin ay mayroong kinalaman sa buhay ng bawat isa.

Nito lamang ika-30 ng Oktubre, naganap ang Eleksyon ng Barangay at Sangguniang Kabataan na kinalahukan ng maraming botante sa iba’t ibang bahagi ng bansa. Bahagi ito ng ating karapatan. Isa ring maituturing na responsibilidad ang makapili at maghalal ng pinuno na makatutulong sa atin upang tayo ay pamunuan tungo sa kaunlaran. Kahit na ito ay isang lokal na halalan lamang, mahalaga ang tungkuling ginampanan ng Parish Pastoral Council for Responsible Voting (PPCRV).

Ang ating parokya ay mayroong tatlong barangay na nasasakupan; ang Sta. Elena (Poblacion), San Roque, at Sto. Niño. May malaking naiambag ang bawat boluntaryong kasapi ng PPCRV tulad ng pagtulong sa bawat botante sa paghahanap ng kanilang presinto, pag-aasikaso sa mga senior citizen at persons with disabilities, pagiging saksi sa mga inilabas na “election returns”, at iba pang gampanin na may kaugnayan sa nakaraang eleksyon.

Nagsimula ang halalan sa ika-7 ng umaga at walang humpay sa pag-aasikaso ang mga kabahagi ng PPCRV hanggang sa mailabas ang resulta ng botohan. Mula rito, makikita natin ang kanilang sinumpaan tungo sa maayos at malinis na halalan. Isa sa pinakatanyag nilang motto ang C.H.A.M.P o ang Clean, Honest, Accurate, Meaningful, and Peaceful elections na kanilang pinanghahawakan. Ito ang susi para makamit ng bawat isa ang kabutihan ng lahat na hinahangad ng kahit sinong kabahagi ng lipunang Pilipino. Kaisa naman sa layuning ito ang Simbahan.

Isa lamang ang boluntaryong gawain na ito sa mga tanda ng kapansin-pansing malawak na ambag ng Simbahan sa lipunan. Hindi lamang ito kaagapay sa espirituwal na pangangailangan at pag-unlad ng mga tao ngunit katuwang din ito upang mapanatili ang katiwasayan at kaayusan sa pamamahalang pambayan o pambansa. Ang Simbahan ang katuwang ng masa sa ganitong kaganapan.

Sa 2025 uli ang nalalapit na halalan. Malayo pa man, handa ang PPCRV upang maglingkod para sa isang maayos at malinis na halalan. Sinasalamin ito ng responsableng gampanin at tungkulin na nagsusulong ng halalang MAKA-PILIPINAS.