Nananahan ang Diyos sa Kanyang mga Templo. Mga gusali tayo ng Diyos. Nilikha tayong may katawan at kaluluwa kumpara sa ibang bagay na lalang sa mundo. Ang ating katawan ay templo ng Diyos na itinalaga upang pag-ingatan. Ang pag-iingat natin sa ating katawan at kaluluwa mula sa pagkakasala ay nararapat lamang. Ito ang tanging paraan upang maipakita natin sa Diyos ang pagpapahalaga sa mga biyayang natanggap natin at sa pagmamahal natin sa Kanya.
Ipinagdiriwang natin sa araw na ito ang Kapistahan ng Pagtatalaga sa Palasyong Simbahan ng Laterano, Roma.
Maaaring marami ang hindi pamilyar sa kasaysayan ng simbahan na ito. Maaaring unang beses lamang itong narinig ng marami sa atin. Ito na ang pagkakataon upang malaman natin na hindi ordinaryong simbahan ang ating ipinagdiriwang sa araw na ito. Bagkus, ang Palasyong Simbahan ng Laterano sa Roma ay ang punong simbahan ng mga mananampalatayang Katoliko. Ibig sabihin, ito ang ulo ng lahat ng simbahan sa buong mundo.
Makulay at mahaba ang kasaysayan ng Palasyong Simbahan ng Laterano. Ito'y minsang mansyon at tahanan lamang hanggang sa panahon ni Nero. Kasama ang may-ari ng mansyon sa pinatay dahil sa pananampalataya nito kay Kristo. Napasakamay ng mga Romano ang lugar na ito at hindi nagamit nang matagal na panahon bilang simbahan. Hanggang sa mamuno si Constantino sa Roma at maipatupad nito ang kalayaan na magpahayag ng pananampalataya kay Kristo. Dito na umusbong ang mga simbahan nating mga Katoliko.
Matapos ang ilang dekada ng pagdanak ng dugo ng mga Banal na Kristiyano ay nagbunga ito sa wakas ng biyaya ng Diyos. Itinayo ang Palasyong Simbahan ng Laterano at itinalaga itong unang simbahan at punong simbahan ng mga Kristiyano sa mundo. Dito rin nanirahan ang mga naunang Santo Papa at nalipat lamang nang makaranas ito ng ilang pagkakataon ng sunog. Ito ang pinakaunang Palasyong Simbahan (Basilica) ng Diyos sa Roma.
Tandaan natin na sagrado ang lahat ng nilikha ng ating Panginoon. Kasama na rito ang mga basilika, katedral, dambana at mga kapilya. Ang lahat ng nahahawakan at hindi nahahawakan sa mundong ito ay nagmula rin sa Dakilang Maykapal. Nilikha ang ating mga katawan at ipinagkaloob sa atin ang kaluluwang mayroon tayo ngayon upang mapanatili itong sagrado bilang pagpapakita ng pagmamahal sa Diyos.
Ganito rin ang ating gampanin para sa mga lugar na dapat manatiling sagrado sa bawat sulok ng mundo.
Manalangin tayo. Panginoon, ipinagkaloob mo sa amin ang mga biyayang nagpapatibay sa aming pananampalataya. Huwag mo nawang hayaan na mawalay kami sa mga itinatag na tahanan Mo sa mundo. Manatili nawa ang apoy sa aming puso at kagustuhan na protektahan ang mga bagay na Iyong nilikha at nakatakdang manatiling sagrado. Ilayo mo kami sa okasyon ng kasalanan lalong-lalo kung kami ay nasasadlak sa kahinaan. Sa Ngalan ng Diyos Ama, Anak at Espiritu Santo.
Amen. +
#OLAmarikina #BirhenNgMarikina
