Tuwing Huwebes Santo ay hindi iginagawad ang huling pagbabasbas. Hinuhubaran ng pari ang altar at inaalis ang Eukaristiya sa Tabernakulo upang ilipat sa Altar ng Repositoryo. Magkakaroon din ng Bihilya pagkatapos nito.
Marso 28, 2024.
Ipinagdiriwang ngayon ng Simbahan ang Huwebes Santo. Ang Huwebes Santo o “Maundy Thursday” ay hango sa wikang latin na “mandato” ibig sabihin ay utos. Sa araw na ito, inaalala natin ang Huling Hapunan ng Panginoon at ang Pagtatatag Niya sa Banal na Eukaristiya. Sa pagkain nila sa hapag, hinugasan ng Panginoon ang kanilang mga paa at binigyan sila ng utos:
“Isang bagong utos ang ibinibigay ko sa inyo ngayon: magmahalan kayo! Kung paano ko kayo minahal, gayundin naman, magmahalan kayo. Kung kayo'y may pagmamahal sa isa't isa, makikilala ng lahat na kayo'y mga alagad ko.” (Juan 13:34-35)
Sa Huling Hapunan ay nagsama-sama ang alagad kasama ang Panginoon. Doon ay pinagpira-piraso ni Hesus ang tinapay at iniabot sa kanila ang alak. Kasama nito ay ang mga salitang sinabi Niya: “Gawin ninyo ito, sa pag-alala sa akin”. Habang inaanyayahan ni Hesus ang mga alagad sa Banal na Hapunan, tayo rin ay inaanyayahan na tanggapin Siya sa Eukaristiya. Sa sama-samang Paghahapunan ng Panginoon at ng mga alagad, pinapaalala nito na tayo ay mag-ibigan at magpatawad. Tayo rin ay magpakumbaba tulad ng halimbawa ni Hesus sa paghugas Niya sa paa ng mga alagad.
Kasama ng pagtatatag ni Hesus ng Banal na Eukaristiya ay ang pagtatatag din ng Banal na Orden o ang pagpapari. Kaya sa umaga, ipinagdiriwang ang Misa ng Krisma o Chrism Mass sa mga katedral. Dito ay sinarariwa ng mga pari ang pangako nila sa Diyos. Ipanalangin po natin sila. Sa Misang ito rin binabasbasan ang mga langis na ginagamit sa Sakramento ng Pagpapahahid ng Langis sa Maysakit.
MGA GAWAIN AT GABAY SA HUWEBES SANTO
Tuwing Huwebes Santo ay hindi iginagawad ang huling pagbabasbas. Hinuhubaran ng pari ang altar at inaalis ang Eukaristiya sa Tabernakulo upang ilipat sa Altar ng Repositoryo. Magkakaroon din ng Bihilya pagkatapos nito. Tandaan po natin na tuwing daraan tayo sa harapan ng Altar ng Repositoryo ay kailangan nating lumuhod gamit isang tuhod man lamang para magbigay galang sa Kabanal-banalang Katawan at Dugo ni Hesus. Ang hindi makaluluhod ay maaring yumuko nang may buong paggalang.
Sinisimulan din ng mga mananampalataya ang Visita Iglesia. Sa espesyal na tradisyong ito, ang mga peregrino ay dumadalaw at bumibisita kay Hesus sa pitong Altar ng Repositoryo. Ang bawat pagbisita ay pagninilay sa pitong huling lugar na pinuntahan ni Hesus. Simula sa Kanyang pagkakadakip hanggang sa Kanyang kamatayan sa Krus.
Hindi rin muna ipinapayo na dasalin ang Istasyon ng Krus sa araw na ito. Dapat natin ituon ang ating pansin na bisitahin ang Panginoon sa Altar ng Repositoryo. Doon ay nakatago Siya sa tabernakulo sa anyo ng puting tinapay. Makakausap natin Siya roon. Maglaan tayo ng isang oras upang Siya ay sambahin at kausapin sa Altar, alinsunod sa sinabi Niya:
“Talaga bang hindi kayo makapagpuyat na kasama ko kahit isang oras man lamang? Magbantay kayo at manalangin upang huwag kayong madaig ng tukso. Ang espiritu'y nakahanda ngunit ang laman ay mahina.” (Mateo 26:40-41).
Ngayong Huwebes Santo, ating sinasariwa ang huling gabi ng Panginoon. Isang gabi bago Niya tuluyang ialay ang Kanyang buhay sa Krus. Sa pagninilay natin ngayon, ipinakita ni Hesus sa mga alagad ang pagsasabuhay ng utos.
Una, tayo ay magpakumbaba at maglingkod. Ipinakita ito ni Hesus nang hugasan Niya ang paa ng mga alagad. Pangalawa tayo ay mag-ibigan at mag-alay sa kapwa. Ito ay binigyan Niya ng kahulugan sa Huling Hapunan.
Tulad ni Hesus, tayo rin ay magpaka-aba upang maitampok natin ang iba. Tularan natin Siya sa Kanyang paglilingkod at pag-aalay. Sa ating mga sakripisyo, hindi man natin maunawaan ang kahulugan nito. Pangako ng Diyos na ang lahat ay magiging makabuluhan kapag natupad na ang Kanyang plano para sa lahat.
